Hatta – 8.Júní

Þá er komið að næstu kvöldgöngu Ferðafélags Mýrdælinga. Hún verður farin fimmtudaginn 8. júní nk. kl. 20:00. Mæting á bankaplanið í Vík, farið á bílum inn að Selhrygg og þaðan gengið upp Kjósir. Ef skyggni er gott er fallegt útsýni yfir Heiðarvatn þegar komið er upp Kjósir áður en lagt er á Höttu. Af Höttu er gengið framhjá Hrafnatindum og niður Bratthól. Gert er ráð fyrir að gangan taki 2-3 klukkutíma.

Verð er 1000.- kr. fyrir félagsmenn og 1500.- kr. fyrir aðra.

Göngustjóri er Guðjón Þ. Guðmundsson.

Ferðanefnd

Auglýsingar

Ganga um Skálmabæjarhraun 25.maí

Ferðin hefst formlega frá afleggjara við Ljósuvatnalækinn (uþb 3 km fyrir austan brúna á Skálm) kl. 16:00 á Uppstigningardag 25. maí, og því þarf að leggja af stað kl. 15:30 frá bankaplaninu í Vík.

Frá mætingarstað verður ekið á 4×4 drifs bílum í nokkrar mínútur áður en gangan sjálf hefst og því þarf að safnast saman í bíla þaðan (eða úr Vík, þau sem að þaðan koma).

Gangan sjálf verður í uþb. 2 klst. og stenst þessa áætlun að vera 1 skór, létt og tiltölulega slétt, og um fallegt og áhugavert svæði sem að fáir hafa komið á.

Verð fyrir félagsmenn er 1000.- kr og aðra 1500.- kr.

Göngustjórar verða Jóhannes Gissurarson og Brandur Jón Guðjónsson

Jónsmessuganga

Jónsmessuganga ferðafélags Mýrdælinga þetta árið verður um Bárðarfell og inn í Deildarárskóla (23.júní). Mæting við bankaplanið kl. 20:00 og sameinast í bíla. Þá verða bílar skildir eftir við slóðann inn að Bárðarfelli og gengið þaðan inn í Deildarárskóla, boðið verður upp á hressingu að göngu lokinni í húsi ferðafélagsins. Séð verður til þess að göngufólk komist aftur í bíla. Göngunni stýra Siggi Hjálmars og Guðjón Guðmundsson.  Verð er 500 kr. fyrir félagsmenn og 700 fyrir aðra. Við hvetjum alla til að mæta í létta og skemmtilega Jónsmessugöngu.

Síðasta kvöldgangan – Skógafjall

Fimmta og jafnframt síðasta kvöldganga Ferðafélags Mýrdælinga verður fimmtudagskvöldið 2. júní nk. Þá verður gengið á Skógafjall. Göngustjóri verður Grétar Einarsson og lofar hann léttri og skemmtilegri göngu en ekki verður gengið alveg á topp Skógafjalls svo þetta ætti að henta flestum. Gangan sjálf mun taka um 2 klst. Þeir sem koma úr Vík geta eins og áður hist við Arionbanka kl.19:30 og sameinast í bíla en Grétar hittir hópinn við Jökulsá á Sólheimasandi. Gjaldið er 500 kr fyrir félagsmenn og 700 kr. fyrir aðra.

Stikun gönguleiða í Höfðabrekkuafrétti

Á laugardaginn næsta 27.6 er ætlunin að merkja nokkrar gönguleiðir inn á Höfðabrekkuafrétti. Þetta er verkefni sem ferðafélagið tók að sér í fyrra fyrir Mýrdalshrepp og er það liður í að fjármagna endurbyggingu Deildarárskóla. Það er búið að merkja hluta af þesssum leiðum og er ætlunin að klára þá vinnu næsta laugardag.
Ef þú hefur áhuga á að vera með í þessu skemmtilega verkefni endilega sendu okkur þá tölvupóst á myrdalur@gmail.com eða skilaboð á facebook.

Vinnuhelgi !

Við minnum á vinnuhelgi ferðafélagsins sem verður núna um helgina. Stefnt er að því að leggja vatn að húsi og salerni ásamt því að koma rotþró í jörð. Einnig þarf að mála og laga til í kringum hús svo af nægu er að taka. Til að boða komu sína er hægt að hafa samband við formann í síma 8588210 eða finna „event“ á facebook og bóka sig þar.