Vinnuhelgi !

Við minnum á vinnuhelgi ferðafélagsins sem verður núna um helgina. Stefnt er að því að leggja vatn að húsi og salerni ásamt því að koma rotþró í jörð. Einnig þarf að mála og laga til í kringum hús svo af nægu er að taka. Til að boða komu sína er hægt að hafa samband við formann í síma 8588210 eða finna „event“ á facebook og bóka sig þar.

Kvöldgöngu frestað !

Kvöldgöngu ferðafélagsins sem átti að vera á morgun fimmtudaginn 4.júní hefur verið frestað um viku vegna undirbúnings vinnuhelgi inn á afrétti 6-7 júní nk.

Kvöldganga 21.5

Minnum á kvöldgönguna um Ártungnahöfuð – Hrútagilsrana. 1 skór, brottför frá plani við Arionbanki kl. 19:30. Verð fyrir félagsmenn er kr. 600.- en kr. 900.- fyrir aðra.
Ólafur Þorsteinsson Eystri Sólheimum mætir í gönguna en hann er mjög staðkunnugur. Annars ætlar Brandur Jón Guðjónsson að leiða hópinn.

Vinnuhelgi 6-7 júní.

Stjórn ferðafélagsins hefur ákveðið að hafa vinnuhelgi 6 og 7 júní nk. Þá verður haldið áfram að standsetja húsið okkar inn við Barð en það eru enn nokkur handtök eftir. Við hvetjum alla sem vettlingi geta valdið til að mæta þó ekki sé nema annar dagurinn en það er líka upplagt að dvelja á laugardagsnóttina í Þakgili. Það skal tekið fram að fyrst og fremst á þetta að vera skemmtilegt hjá okkur:)

Fyrsta kvöldgangan…

Nú styttist í fyrstu kvöldgöngu ferðafélags Mýrdælinga en þá verður gengið frá Uxafótalæk um Krákugil og í Fagradal,1 skór. Brottför er kl. 19:30 frá Arionbanki í Vík 23.apríl nk. Verð fyrir félagsmenn er kr. 600.- en kr. 900.- fyrir aðra. Göngunni stýrir Æsa Gísladóttir.

Eftir aðalfund

Aðalfundur ferðafélags Mýrdælinga var haldinn sunnudaginn 1. mars sl. Á aðalfundi var kosið í stjórn, ferðanefnd og voru tveir skoðunarmenn reikninga kosnir. Ekki er mikil breyting í skipan stjórnarmanna en undirritaður og Sigurður Hjálmars höfðu sætaskipti.
Í ferðanefnd hættu Jón Hjálmarsson og Fjóla Gísladóttir og inn koma í staðinn Margrét Steinunn Guðjónsdóttir og Æsa Gísladóttir.
Skoðunarmenn reikninga voru kosnir Grétar Einarsson og Eiríkur V. Sigurðarson.
Starfsskýrsla fyrir árið 2014 var lögð fyrir fundinn og má finna hana hér á heimasíðunni.
Stóru málin þetta árið er að halda áfram eins og fjárhagur leyfir að koma byggingu Deildarárskóla áfram og að standa fyrir áheitagöngu til fjáröflunar. Nánar um það síðar.
Við hvetjum svo alla til að reyna að ná í nýja félaga til að ganga í félagið en hver félagi skiptir máli.
Bestu kveðjur
Guðjón Guðmundsson form.

Ferðaáætlun 2015

Brottför: kl. 19:30 frá Arion banka, Vík, nema annað sé tekið fram.

Uxafótalækur – Krákugil – Fagridalur   1 skór
23. apríl

Jökulhaus við Sólheimajökul   1 skór
7. maí

Ártungnahöfuð – Hrútagilsrani   1 skór
21. maí

Reynisfjall – Svartafjara   1 skór
4. júní

Vatnsrásarhöfuð    1 skór
23. júní, Jónsmessuganga.

Hornfirðingar heimsækja Mýrdalinn.
18 – 19 júlí  Nánar á vefsíðu og facebook þegar nær dregur.

Göngurnar verða auglýstar nánar á vefsíðu deildarinnar http://www.myrdalur.com og á Facebook.

Heimsókn og styrkumsókn

Helgina 28. og 29. júní n.k. hafa félagar í Ferðafélagi Austur Skaftafellssýslu boðað komu sína til okkar í vinnuferð. Ferðafélag Austur Skaftfellinga ætlar að gera meira fyrir okkur en nýlega tilkynntu þau okkur þá ákvörðun sína að styrkja Ferðafélag Mýrdælinga um kr. 200.000.- sem deildin tekur út í vörum hjá Húsasmiðjunni. Sendum við þeim bestu þakkir fyrir.

Nýlega hefur Ferðafélag Mýrdælinga með aðstoð Kötluseturs sótt um styrk frá Framkvæmdasjóði ferðamannastaða. Sótt er um kr. 1.488.479.- sem ætlaðar eru til áframhaldandi byggingar skálans (Deildarárskóla) í Höfðabrekkuafrétti. Reiknað er með að mótframlag félagsins, 1.500.000.-verði vinnuframlag félaga og annara velunnara.